10 сьнежня адбыўся запуск ініцыятывы “Народныя амбасады Беларусі”.
Народныя амбасады – гэта ініцыятыва, якую рэалізуе супольнасьць беларускіх дыяспар “Беларусы Замежжа” пры падтрымцы Народнага антыкрызіснага кіраваньня. Яна накіраваная на стварэньне прадстаўніцтваў дэмакратычнай Беларусі за мяжой ва ўмовах страты легітымнасьці цяперашняй уладай у краіне й за яе межамі. Ва ўрачыстым адкрыцьці амбасадаў возьмуць удзел Сьвятлана Ціханоўская ды прадстаўнікі Прэзідыума Каардынацыйнай рады; яны ўдзячныя беларусам замежжа за іх актыўную пазіцыю і гатовыя падтрымліваць праект.
Ідэя стварэньня Народных амбасадаў паўстала пасьля таго, як выбары ў Беларусі былі прызнаныя нелегітымнымі народам краіны й міжнароднай грамадскасьцю, а МЗС і амбасады, якія падтрымліваюць незаконную ўладу, страцілі права прадстаўляць інтарэсы беларусаў за мяжой.
«Вельмі сімвалічна, што менавіта сёньня, у сусьветны дзень абароны правоў чалавека, ва ўсім сьвеце адчыняюцца Народныя амбасады.
Беларусы замежжа выконваюць вельмі важную ролю ў стварэньні будучыні дэмакратычнай Беларусі. Сёньня нам, як ніколі, важна быць разам.
Дарагія беларусы замежжа, калі ласка, не спыняйцеся, працягвайце інфармаваць жыхароў вашых краінаў аб сітуацыі ў Беларусі. Беларусь не павінна сыходзіць з сусьветнага парадку дня. Я заклікаю вас распавядаць не толькі пра жорсткасьць рэжыму, пра катаваньні ды пра палітвязьняў, але й пра ўнікальны беларускі характар. Змагаючыся з уладай, якая выступае супраць правоў чалавека, мы дэманструем усяму сьвету важкасьць чалавечай і грамадзянскай паставы.
Дзякуй кожнаму з вас за вашу працу. Толькі разам мы зможам адолець беззаконьне і як найхутчэй наблізіць Беларусь да волі. Жыве Беларусь!» – падтрымала беларусаў замежжа нацыянальная лідэрка Сьвятлана Ціханоўская.
Стварэньне Народных амбасадаў абмяркоўвалася на Сусьветным кангрэсе беларусаў, які адбыўся 30 кастрычніка – 1 лістапада 2020 года, і замацавана ў яго рэзалюцыі. Рашэньне аб стварэньні прыняла беларуская дыяспара. Народныя амбасады возьмуць на сябе функцыі афіцыйных: інфармаваньне пра сітуацыю ў краіне, дапамогу суграмадзянам, абарону інтарэсаў Беларусі ў міжнародных арганізацыях і палітычных установах.
Ініцыятыву стварэньня такіх прадстаўніцтваў дэмакратычнай Беларусі за мяжой падтрымалі Святлана Ціханоўская, Каардынацыйная рада й Народнае антыкрызіснае кіраваньне.
«Важна адзначыць, што ініцыятыва стварэньня альтэрнатыўных беларускіх прадстаўніцтваў за мяжой належыць удзельнікам Сусьветнага кангрэсу беларусаў, які праходзіў 31 кастрычніка – 1 лістапада гэтага года. У працы гэтага форуму ўзялі ўдзел каля 150 тысячаў грамадзян і эмігрантаў зь Беларусі, якія пражываюць у больш як 50 краінах сьвету. Характэрна, што цырымонія адкрыцьця Народных амбасадаў праходзіць 10 сьнежня, у 72-я ўгодкі прыняцьця Генеральнай асамблеяй ААН Усеагульнай дэкларацыі правоў чалавека, якая стала краевугольным каменем сучаснай праваабарончай сістэмы. Мы перакананыя, што адкрыцьцё народных амбасадаў – гэта толькі першы крок на шляху да пабудовы прынцыпова новых стасункаў паміж дэмакратычнай Беларусьсю і яе суседзямі ды іншымі замежнымі партнёрамі», – адзначыў член прэзідыума Каардынацыйнай рады Павел Латушка.
Кантакты для прэсы:
www.germany.belarusabroad.org
